宅女日記

（英雄紀念碑）

第二日，正式展開馬來西亞行程
天氣陰陰咁，正是我最喜歡的天氣
因為唔會曬到我對眼翁埋一切嘛
影相都靚Ｏ的，嘻

今日主要係遊吉隆坡
第一站係蘇丹皇宮，到此一遊影相Ｏ既地方
兼且都係同守門隻馬影相
好笑係我影個隻馬成日郁黎郁去
搞到我媽咪同佢影個陣都有Ｏ的驚囉

之後，就去左國家博物館
聽下馬來西亞歷史，瞭解下當地文化
原來馬來西亞有好多個蘇丹
而且每個人都有唔同帽，真係無諗過喎

兩個觀光之後，就到ＳＨＯＰＰＩＮＧ時間
帶左我去買兩樣野：朱古力及咖啡
因為要派街坊，所以買左大量朱古力
而咖啡因為唔係個個鐘意飲，就買左少量
但係，其實Ｏ的白咖啡都幾好味喎
無咖啡咁濃，清清地咁，幾好飲丫

買完野，又去觀光
今次去Ｏ既係英雄紀念碑，即係第一張相個個地方
我完全唔記得左個度個歷史
唯一印象係個石像有少少似某一幅世界名畫

咁就過左半日，係時候食飯
今次食Ｏ既係娘惹餐，係我覺得最好食Ｏ既一餐
有雞有魚有菜，最正係甜品個個椰子雪糕，勁香椰子味

（娘惹餐）

食完晏，就去雙子塔
影左到此一遊相後，就去SHOPPING
主打VINNCI呢間鞋舖，買左兩對鞋
之後再匯合參觀水族館，睇下鯊魚……其實都係普通水族館咁

最後一個行程係去黑風洞
個度有一個金光閃閃Ｏ既佛像
另外，個度可以飲到新鮮拉茶，亦都係我覺得至好飲Ｏ既拉茶
仲有食埋個薄餅
但係黑風洞係睇乜，我到依家都未搞得好清楚……

因為今晚住間酒店響雲頂
所以，完左黑風洞就走去搭纜車上山去雲頂酒店
雲頂，一如其名，係好多"雲"O既山"頂"
見到全部都係霧，唔怪得佢有咁多鬼故可以聽囉
呢間酒店，外表靚，但間房一Ｏ的都唔靚
最特別係有個吊扇響度轉下轉下

我都好耐無見過吊扇囉……

對酒店最好Ｏ既印象
就係個咖央多士好好食
另外，幸運Ｏ既係，我響個度無乜怪事發生過