宅女日記

時間係26/12到28/12
因為意外有假
順理成章，又係去左我最熟ｏ既台北啦

今次去又係買書同埋買野食
因為唔洗去九份就可以買到我想買ｏ既野
所以比起上次多左大半日出黎
本來諗住去陽明山睇夜景，但係因為無帶相機
同埋得自己一個唔知做乜，所以最尾無去到
又諗過去坐貓空，但係因為驚而無去
結果，就係無乜特別ｏ既行程囉

唯一有驚喜，就係我去誠品信義旗艦店
個度真係好大，好多書可以睇
又有座位可以俾人打書釘
好正，我響個度都睇完本＜華氏４５１度＞
係一個消磨時間ｏ既好地方

至於今次敗家數目呢
完完全全係出乎我預計之外的……多
買左六套日劇ｄｖｄ，
包括螢之光、夢想家、醫龍１＆２、伽俐略、交響情人夢
三套電腦遊戲：幻想三國誌４、軒轅劍外傳、迷城國度
大量小說：包括言小及一堆厚到掟死狗ｏ既長篇小說
四盒鳳梨酥、十一包花生酥、一盒綠豆糕……
只靠一個２２寸行李箱及一個大背包便帶回香港
拖去機場好似拖舊石咁，我都好佩服我自己可以成功托到上車
亦都提醒我，下次都要帶大個ｏ的ｏ既行李箱去台北

下次去旅行係出年二月
目標係台灣……無錯，又係台灣
係咪好想打死我？？
其實係因為個度有書展……
俾同事知道ｏ既話，又會笑我個邊有男友等我去突擊啦～