宅女日記

可能響每個阿媽心目中
仔女都係未大
要教，要指導
我唔否認
長輩始終係長輩，人生經驗多過我
但係又有時又會覺得
我已經過左二十三歲
您仲要咁樣點黎點去，會唔會好煩呢？

無啦啦有咁ｏ既感嘆
係因為今日同阿媽出街
撞到ｏ的街坊
我一出去，見到街坊，
點頭打左招呼
但係阿媽就係咁搵手錚撞我
都唔知佢想點

之後，佢就問我
有無開聲叫乜太丫
我個時心諗，您當我幾多歲丫
我點都唔會唔打招呼
有時點頭都算係打招呼一種
為甚麼非得要好似細路咁出聲用力咁嗌
先叫做有禮貌？？

個時我真係有ｏ的唔高興
仲覺得有ｏ的煩夾忟
其實除左ｏ的個問題外
有好多野我都覺得佢管得太多

好似細佬ｏ既野，佢都成二十幾歲人
有自己諗法唔出奇，
但係佢又覺得佢唔聽勸，唔嗲唔掉咁
或者係真，但係佢已經係一個成年人，
應該為自己做ｏ既野負責
有時我都覺得，唔理得咁多
由得佢自己自己錯自己揹鑊都未嘗唔係一件好事

我相信阿媽ｏ既出發點係好ｏ既，都係出自關心
但係有時候都覺得係一種壓力……或者係我唔惜福啦
若果可以，我都想搬出去自己住
或者到時會更加珍惜自己同埋家人ｏ既關係