北京行：第一日 @ 宅女日記

第一日ｏ既行程係咁ｏ既
搭ＫＡ９０８去到北京－＞頤和園－＞涮羊肉（不知名店）－＞王府井大街、東華門夜市
－＞返酒店（京倫飯店）

第一日，因為復活節ｏ既關係
所以我地兩母女要早成三個鐘響機場集合
一去到機場，人頭湧湧
香港人果然係唔鐘意留響香港丫
一有假期個個都出埠
因為要避靜，因為人多
兼且搵唔到間ｍ記（原本個間好似會變做ｂｕｒｇｅｒ　ｋｉｎｇ）
所以去左翔天廊食早餐就算
響飛機到，因為坐得尾，所以成兩點先食晏
好彩之打左個底，唔係實餓死
不過飛機餐都幾好食，暫時係我食過最好食
可能係因為鴻星提供掛

去到北京
接待我地個位小姐姓吳
一位操半鹹半淡廣東話的女仕
所以我對佢ｏ既講解都係明一半唔明一半
第一站係慈禧太后響圓明園舊址起番ｏ既頤和園

慈禧太后ｏ既歷史好多
連戲都有拍過
有傳佢係宮女做起
但起導遊同我地講係假ｏ既
佢應該會一位高官ｏ既女
因為選妃會好嚴
要有一定出身先會做到妃子

講番頤和園
俾我ｏ既第一個感覺係大，都明ｏ的古人點樣可以行咁耐
不過景色真係幾靚
特別係我地去個陣係近黃昏
連埋個湖，整個感覺都好好

仲有ｏ的玉蘭花，慈禧最鐘意ｏ既花
都係好靚，連我都好鐘意

行完頤和園
就去左食晚飯，亦係響北京ｏ既第一餐
在不知名的火煱店食涮羊肉
沒有小肥羊那麼好食
因為佢個湯係清過清水ｏ既清湯
而餸方面，真係得羊肉，再加ｏ的菜同埋雞肉
所以感覺麻麻地
唔知名店東來順係咪都係咁呢？

食完晚飯就去左王府井大街同埋東華門夜市
因為去得遲，王府井大街無野行
淨係食左夜市ｏ的野
基本上檔檔賣ｏ既都係同一樣野
無乜好食
同台灣ｏ既差得遠囉
食左烤羊肉串，幾好食，不過因為怕衛生，所以淨係食左一條
炸鮮奶就把鬼，無奶味，好似食緊舊粉咁
迷你小籠包……無乜特別，不過佢ｓｅｌｌ　ｏ既係蟹粉，我就食唔到囉

食完就返酒店
我地住ｏ既係京倫飯店
一所近市區，響長安街ｏ既飯店
四星級，不過都幾靚
房又大，設備齊
兼且唔係用我最憎ｏ既紙拖鞋而係絨拖鞋
不過我間房個景就差ｏ的
對民房，無野睇